اتحبست بدل حماتي كامله بقلم هويدا زغلول

انا رقبتي سدادة طبعا
ام أسامة
ربنا يخليك يا معلم محروس هو ده العشم ياخويا ربنا مايحرمنا منك ابدا والله انت مافي منك ابدا
وبعدها ادي لحماتي الفلوس ورجعت البيت وقالت لأسامة
خود ياضنايا الفلوس اهيه سلك نفسك بيها وادفعها للسفر وربنا يكرمك ان شاء الله
أسامة باستغراب
ايه ده ياما الفلوس دي جبتيها منين هو انتي لحقتي تعملي الجمعية ولا ايه فهميني ياست الكل الفلوس دي جات منين
الام
ربك هو اللي رزق يابني الله خودهم ومشي امورك وخلاص هو انت لازم تسأل يعني منين ومش منين خودهم بقا
أسامة
ياست الكل المبلغ كبير وانا خاېف تكوني ورطي نفسك مع حد ولا حاجة قولي لي جبتيهم منين
زهرة
ماخلاص يا اسامة بقا ماهي امك قالت لك انها جبتهم من باب الله هو انت هتعترض ولا ايه قول الحمد لله انها عرفت تتصرف وتجيب لك الفلوس وانت لما ربنا يكرمك ان شاء الله تبقا تبعتهم لها وتسدهم
الام
بالظبط كده زي مراتك ماقالت انت اول لما تسافر تبعتهم علطول عشان ارجعهم مكانهم
أسامة
خلاص انا اول لما انزل من الطيارة هناك هبعتلك الفلوس دي كلها ههههه ربنا مايحرمني منك ياست الحبايب ويخليكي لينا يارب
وبعدها بكام يوم جه ميعاد سفر أسامة وقالي
انا عايزك تخلي بالك من نفسك يا زهرة وتخلي بالك من امي اوعي تزعليها ولا تخليها تغضب عليكي انتي عارفه امي عصبيه بس قلبها ابيض
زهرة
امك دي حبيبتي يا اسامة ده ربنا اللي عالم انا بعزها زي امي اد ايه والله انا مليش حد أغلى منها في الدنيا دي في عنيا الاتنين
أسامة
ايوه كده ربنا يخليكي يا زهرة انا عايزكم انتي وهي تبقو دايما مع بعض زي السمنه على عسل كده عشان ابقي دايما سامع عنكم سمع خير
زهرة
اطمن ياحبيبي ان شاء الله هتبقي مبسوط مننا اوي انا وحماتي
وبعدها بيومين خلاص أسامة ماشي حماتي حضنته وقالت له
مع السلامة ياحبيبي خلي بالك من نفسك وكل كويس يا اسامة وابقي اتغطى كويس يابني انا عارفه الجو في بلاد بره بيبقا عامل ازاي ده بيبقا تلج
أسامة
ان شاء الله يا أمي هخلي بالي من نفسي انت بس تخلي بالك من البت زهرة دي انا كمان وصيتها عليكي انا عارف انتي بتحبيها اد ايه
الام
ربنا اللي يعلم ياحبيبي دي البت دي غاليه عندي ولا أغلى من بنتي هي عارفه اصلا وانت اطمن علينا وخليك في شغلك وحياتك يابني
أسامة
حاضر يا أمي أنا هخلي بالي من نفسي يلا بقا عشان انا لو فضلت قاعد اسلم عليكم كده كتير الطيارة هتفوتني انا ماشي بقا
الام
بالسلامة ياحبيبي ربنا معاك يا اسامة يابني ان شاء الله نسمع عنك كل خير
ومشي أسامة وحماتي قالت لي
بطلي عياط بقا يابت انتي هتفولي على ابني ولا ايه بطلي يابومة انتي
زهرة
الله هو مش جوزي ياما واول مره يبعد عني لا وهيقعد سنتين غايب انا هعمل ايه من غيره انا
الحما
ولا هتعملي حاجة ياعين انا معاكي اهو يابت وعايشة معاكي وادينا انا وانتي هنتسند على بعض وبطلي نواح بقا وعياط وقومي فزي اعملي لنا الغدا يلا يابت متتاخريش عشان انا جعانة
زهرة
حاضر ياما انا هدخل احضر الاكل اهو
وعدت الايام واسامة مسافر وبقا يكلمني كل يوم وفي يوم قالي
والله يا زهرة انا مش عارف اقول ايه انا من ساعت ماوصلت وانا تعبان اوي ومتكحرت هنا ومش لاقي شغلانة عدله
زهرة
معلش يا اسامة استحمل ياحبيبي اومال هتعمل ايه يعني اوعي تقول ارجع وتخسر كل الفلوس احنا مصدقنا اننا لقينا فلوس عشان تسافر