فلاش باك.
حاولت تسيب اي دليل يوصلنا للفاعل واكيد محبتش تكتب دا بنص مباشر تحسبا لإنه اكيد هيمحي كل الآثار بتاعته من الشقة زي ما عمل بالفعل .. فكتبت الارقام دي علشان توصل بيها رسالة معينة ..
ايه العمل دلوقتي يا ايهاب
اول حاجة لازم نحرك بلاغ رسمي عشان نقدر نجيب لجنة ترفع البصمات من الشقة للأسف أنا مش هقدر امسك القضية دي بنفسي لانها برا دايرتي بس اقدر أتابع التحريات من قريب بعلاقاتي واعرف وصلوا لايه الحاجة التانية ام سمية لازم نتكلم معاها لأننا مش هنوصل لحاجة من غيرها
والله اللي تشوفه يا ابو علي احنا زي ما انت شايف كدا جينا الشقة وقلبناها حتة حتة ومطلعناش منها باي معلومة امها آخر طريق قدامنا حتى البصمات بعد ما نرفعها دا لو مكانش طمسها اصلا برضو مش شرط توصلنا لحاجة
مش دايما لما يكون له فيش وتشبيه عندنا نقدر نجيبه لكن لو مالوش سوابق البصمات دي هنبلها ونشرب مېتها ..
وهو الفيش والتشبيه بيتعمل للسوابق بس عشان تتقدم لأي وظيفة دلوقتي لازم تعمل فيش جنائي واكيد يعني بيبقى فيه نسخة منه عندكم في الوزارة
برضو يا حسن دي مجرد فئة واحدة بس اللي بيتوظفوا مش اجراء ملزم لكل الشعب يعني مش زي بطاقة الرقم القومي مثلا وبعدين يعني يا عم حسن انت شايف بعينك كدا اللي ياخد شقة زي دي ويصرف عليها كل المصاريف دي عشان في الاخر يقضي فيها يوم في الاسبوع دا يبقى واحد موظف مستحيل يعني يا حسن
لا طبعا بس كمان لازم نعمل كنترول على أعصابنا مش هنعمل اي حاجة طول ما احنا مشدودين كدا اهدى يا حسن واديني مساحة أتصرف .. بكرا الصبح احنا هنروح عند ام سمية وهنتكلم معاها ونشوف هنطلع منها بإيه ..
بكرا الصبح انا هقعد على أعصابي كدا لحد بكرا الصبح يا ايهاب
روحنا البيت إيهاب نام وانا فضلت صاحي قاعد ابص للأرقام اللي صورتها واللي كانت سمية كاتباها يعني ايه 2211 ممكن يكون ايه معنى الارقام دي كنتي عايزة تقولي ايه يا سمية ..
وفضلت اضرب اخماس في اسداس لحد الصبح خدت ايهاب وروحنا بيت مامة سمية واتفقت معاه ان هو اللي هيتكلم ..
لما ايهاب حكالها اللي حصل الست مصدقتش ولا كلمة واڼهارت تماما وبعدين مسكت فيا انا واتهمتني ان انا اللي خطڤتها واني بكرهها من ساعة ما طلبت الطلاق وكلام كتير كدا واننا جايين نعمل عليها الفيلم دا عشان نبعد الشبهات عن نفسنا كلامها كان جارح جدا طبعا بس كل دا مفرقش معايه اللي فرق معايه بجد ان آخر خيط ممكن يوصلني لسمية خلاص اتقطع يااااا رب حتى البني آدم اللي جيبته يساعدني عنده مخزون من اللا مبالاة لو اتوزع على سكان العالم مفيش مخلوق في الدنيا هيبص جنبه وهو بيعدي طريق سريع ..
محمد صلاح خد الحذاء الدهبي باين او حاجة زي كدا وعمل لفتة محترم جدا في الاحتفال اللي اتعمله سأل على ابو تريكة ايه دا ..
ايهااااااااااب
فيه ايه يا ابن المچنونة سرعتني
محمد صلاح وأبو تريكة
مالهم
2211 الشفرة
شفرة ايه
الارقام يا ابني اللي سمية كانت كاتباها على سور البلكونة 22 رقم التيشرت بتاع ابو تريكة و 11 رقم التيشرت بتاع محمد صلاح
حلو أوي خلاص احنا ناخد المعلومات الخطېرة دي ونطلع بيها على سيادة اللوا مدحت شلبي أو سيادة العقيد أيمن الكاشف ونحل اللغز معاهم
انت بتهزر
وانت بتتكلم جد فعلا انت حياتك في وسط الضفادع والفيران خلت تفكيرك يوصل للمستوى دا
يا بني ادم انت انا متأكد أن سمية كانت تقصد كدا سمية كانت مهووسة بالكورة واكيد لما حست بالخطړ اتصلت بيا وسابتلي الرسالة دي عشان اقدر اوصلها
ايوه الرسالة دي نفهم منها ايه ان ابو تريكة وصلاح هما اللي خطفوا طليقتك طب قول طارق حامد وعمرو ذكي كنت صدقتك
ايهاب انا مش عايز غباوة واستظراف اللي سمية تقصده ان اللي خطڤها اسمه ميكس من الاتنين دول
طب وترتيب الاسم
أكيد نفس ترتيب الارقام 11 الاول وبعدين 22
طب مبدئيا كدا دي الشت منك لأن الاتنين اصلا اسمهم محمد .. اوت المرادي يا كابتن
يمكن تقصد أول اسم من محمد صلاح وتاني اسم من ابو تريكة
حبيبي انت لو مشيت ورا ابو تريكة هتلاقي عيلته لحد ثورة 19 اسمهم محمد برضو دا اسمه محمد محمد محمد ابو تريكة هتروح فين ..
ايوه يا ايهاب بس اسم الشهرة بتاعه محمد ابو تريكة
طيب ممكن ناخد اول اسم من صلاح وتاني اسم من ابو تريكة
غلط برضو ما هو بالشكل دا هيطلعلك محمد ابو تريكة ولو كانت تقصد كدا كانت كتبت 22 أسهل وبعدين انا مش فاهم احنا بنعمل ايه انا حاسس اني قاعد مع سامح ابو عرايس
يا ايهاب الله يكرمك لو مش ناوي تساعدني خلاص اوكيه بس بلاش تحبطني مش كل شوية هتكلم معاك في الموضوع دا ..
استنى يا حسن استنى صلاح ابو تريكة
مين صلاح ابو تريكة ده
رجل الاعمال صاحب اكبر توكيل عربيات في البلد انت ازاي متعرفوش وللا هتعرفه ازاي ما انت راكب عجلة حربية مش وقته يا ايهاب يعني انت تعرف واحد بالاسم ده فيه حد فعلا اسمه صلاح ابو تريكة
ايوه يا ابني بقولك مشهور جدا
ولما هو مشهور جدا يا حيوان ساكت ليه من الصبح وسايبني في حيص بيص ..
تليفون ايهاب رن في الوقت دا كان حد من زمايله الظباط اللي في الكماين اللي في مداخل ومخارج القاهرة كان بعتلهم صورة لسمية عشان يساعدوه وجايز حد فيهم يشوفها اللي اتصل بيه كان واحد صاحبه في قسم شرطة الشيخ زايد وقاله انهم لقيوا واحدة نفس المواصفات دي وطلب مننا نروح نتعرف عليها
