جبت لحماتي هديه _السادسه_ بقلم هويدا زغلول

جبت لحماتي عقربة في عيد الام
الحلقة السادسة
ريتال اټصدمت من كلام ماهر وقالتله
انت قولت انك عايز تتجوزني انا ياماهر بس ازاى
ماهر
ازاى ايه يا ريتال هتجوزك زي الناس هي دي فيها ازاى برضو
ريتال
اه ازاى يعنى عايز تتجوزني وانت متجوز لا ومتجوز مين دي تبقا اخت جوز اختي
ماهر
طيب وفيها يا ريتال هو مش انا من حقي اتجوز تاني وتالت برضو ولا ايه
ريتال
ايوه بسس يعنى اشمعنا انا بالزات
ماهر
عشان عجبتيني وډخلتي قلبي وبصراحه كنت اتمنى اني اقابلك من زمان بس النصيب بقا ياست ريتال اعمل ايه
ريتال

بس تفتكر انا لو وافقت حد من العيله هيوافق يعنى اولا كده اختي مروة مش هتوافق وثانيا ابيه هاني مش هيرضي ان جوز اختة يتجوز عليها وبكده حضرتك هتعمل فتنا في العيله كلها وهبقا انا اللي وقعت العيلة كلها في بعض لا لا ياعم بلاها الجوازه دي وشوفلك واحدة احسن
ماهر
بلاها ايه وبتاع ايه ريتال انا مبهزرش معاكي انا فعلا عايزك في حياتي انا محتاجلك واذا كان على العيله احنا نخلي جوازنا في السر فترة وبعد كده نقول للكل
ريتال قامت وقفت وقالت له
انت بتقول ايه ياماهر اتجوزك في السر ازاى لا طبعا مش هيحصل عن اذنك
ماهر مسكها من دراعها وقالها
استني بس يا ريتال لما نكمل كلامنا انتي رفضاني ليه بس
ريتال
عشان مش انا اللي اتجوز في السر يا استاذ ماهر انا مش عامله عامله وخاېفه منها انا لسه بنت وصغيره وحلوه والف مين يتمناني
ماهر
عارف انك صغيره وحلوه والف مين يتمناكي بس انا يتمناكي ونفسي تكوني ليا انا هسيبك تفكري يا ريتال بس بالله عليكي ماتسبيني متعلق كده كتير
سابته ومشيت رجعت البيت عمتها قابلتها وقالت
اهلا ياختي انتي كنتي فين يابت لحد دلوقتي انتي يابت ملكيش حاكم ولا ايه دلوقتي لما الناس تشوفك راجعة في وقت زي ده يقولو عليكي ايه
ريتال
انا كنت قاعده مع واحدة صاحبتي ياعمتي وبعدين وقت متأخر ايه احنا في رمضان والناس كلها في الشوارع وسهرانين ومحدش بينام يعني مش هيركزو معايا ويقولو رايحة فين وجايه ومنين
فتحي
ماخلاص بقا ياوليه سيبي البنت تدخل اوضتها وبعدين زي ماقالتلك الناس كلها سهرانة في الشوارع
العمة
تعرف تسكت انت خالص ولا متعرفش ملكش دعوة ياراجل انت يلا يابت ادخلي على المطبخ حضري السحور واغسلي الأطباق اللي في الحوض
ريتال
حاضر ياعمتي هغير هدومي وادخل عي المطبخ
ودخلت اوضتها وقالت لنفسها والله ياعمتي انا نفسي اتجوز عشان اخلص منك انتي بالزات وبعدين ماهر مش وحش عشان ارفضه بس ده عايزني في السر يعنى من ماحد يعرف لا لا فكري بهدواه ياريتال عشان ماترجعيش ټندمي
وعند مروة في بيتها حماتها قالت لها
زمانك كنتي مرتاحة مني في البيت وعماله تبرطعي فيه براحتك مش كده
مروة
معقولة الكلام ده برضو ياحماتي ده انتي الخير والبركه بتاعتنا ده
حتى البيت مكنش ليه حس من غيرك
ثريا.
امممم اعمليهم عليا يابت هو انا مش عارفاكي يعنى ولا ايه على العموم انا يمكن اروح لسهي تاني قريب عشان اطمن عليها
مروة
الا هي صحيح طلعت حامل بجد ولا ايه
ثريا
ها لا اسكتي يابت يامروة دي فضلت ياعين امها ترجع وتجلها دوخة فعلا وكنت بقول يمكن وكانت عندها كل اعراض الحمل بس وفي الاخر طلع عندها برد في معدتها
مروة
اااه منا قولت اكيد برضو هيطلع برد لأنها لا يمكن تحمل يعنى
ثريا
قصدك ايه يعنى ياست مروة
مروة
ها لا ابدا مش قصدي حاجة بس اصل سهى كانت علطول تقولي انها مش عايزة تحمل دلوقتي خالص عشان يعنى بتتعب في الحمل والسهر بالعيال والكلام ده منا عارفة ان سهى مدلعه ومش بتحب تعمل حاجة
ثريا
ااه ياحبيبتي وبعدين أعيش وادلعها يامرات ابني ولا انتي عندك رأي تاني
مروة
لا رأي تاني ايه ربنا يخليكي ليها ياماما
وفي الوقت ده دخل يحي من بره ومروة قالت
اهو يحي جه اهو اسيبك معاه بقا وادخل اخلص المطبخ
يحي
نورتي بيتك يا ما البيت كان وحش من غيرك ياست الكل والله
ثريا
حبيب امك والله ماحد كان وحشني في البيت ده غيرك انت يا يحي
يحي
ربنا ما يحرمني منك ياست الكل بقولك ايه ياما انا كنت عايز اخطب واتجوز بقا واكمل نص ديني وافرحك بيا وكده
ثريا
اااه قول كده بقا اصل الډخله بتاعتك والبيت كان وحش من غيرك ياما ونورتي ياما كان وراه ابني عارفاك كويس
يحيى
هههههههه طول عمرك بتفهميها وهي طايرة ياسوسو بس والله انتي فعلا نورتي البيت
ثريا
اسمع ياواد انت ماهو لو كنت جاي تكلمني عن البت اخت اللي ماتتسمي مرات اخوك يبقا تنسي الموضوع ده خالص ومتتكلمش فيه
يحيى
لا اخت مرات اخويا ايه بس دي اللي انا ابصلها لا طبعا وبعدين انا عارف اصلا انك مبتقلبيش مروة مرات اخويا مع انها طيبة وبنت الحلال يبقا عايزاني اجيبلك اختها كمان لا لا مش دي خالص
ثريا
ايوه كده ياحبيب امك ريحت قلبي بس قولي بقا مين هي دي اللي انت عايز تتجوزها
يحيى
قريب اوي هتعرفيها ياما وان شاء الله هفرح قلبك ياست الحبايب
ثريا
طيب ياخويا لما نشوف
وعند سهى قالت لماهر
ايه الشياكة دي كلها ياماهر اللي يشوفك كده يقول انك رايح تخطب مش رايح الشغل
ماهر
جرا ايه يا سهى هي اول مره يعني ابقا متشيك كده ولا ايه ما انتي عارفه اني انا طول عمري بنزل الشغل وانا شيك وبعدين هو انت بتغيري عليا ولا ايه
سهى 
اه طبعا ياحبيبي وهو انا قولت ايه يعنى انت فعلا طول عمرك شيك وهو يعنى بلاش اغير عليك ياماهر ولا ايه
ماهر 
ايوه كده اعترفي يلا انا نازل للشغل هو انتي صاحية بدري ليه كده منا بنزل كل يوم وانتي نايمة
سهى 
اصل ياحبيبي ريحة البرفان بتاعتك اللي صحتني انا هكمل نوم
تاني يلا ابقي طفي النور وانت نازل
ونزل ماهر راح شغله وقابل إيهاب وقاله
صباح الخير يامعلم ها طمني عملت ايه في الموضوع اياه
ماهر
ولا حاجة يا إيهاب اتكلمت معاها وقولتلها اسيبها تفكر تصور رفضت فكرة الجواز في السر بصراحة انا لقيت ان عندها حق بنت حلوه زيها وفي بداية حياتها المفروض انها ماتتجوزش في السر
إيهاب
ماهو مينفعش برضو ياصاحبي تتجوزها غير كده عشان مراتك وبنتك وكمان بتقول انها من العيله يعنى استحاله انه ينفع على العموم سيبها تفكر وان شاء الله خير على فكره احنا معزومين بكرة المدير عملنا فطار جماعي ابقي اعمل حسابك بقا يامعلم
ورجع ماهر البيت وقال لسهى 
انا هافطر بكرة في الشركة ياسهي المدير عزمنا كلنا
سهى 
طيب بقولك ايه ماروح انا ونور عند ماما نفطر عندها
ماهر 
خلاص اعملي اللي يريحك
واتصلت سهى بامها وقالت لها وثريا قالت لمروة 
اعملي حسابك يامروة سهى هتيجي تفطر معانا بكرة انا عايزاكي تعملي لها كل الاكل اللي هي بتحبه
مروة 
عنيا يا ماما بس اكيد جوزها هيجي معاها مش كده
ثريا 
لا جوزها مش جاي دي هتجي هي ونور بس عشان ماهر معزوم على الفطار في الشغل بتاعه
مروة 
حاضر ياماما بس قوليلي هنعمل اكل ايه عشان اللي عارفة سهى بتحب ايه ومش بتحب ايه
وقالت لها على كل انواع الاكل اللي تعمله وتاني يوم راحت سهى عند امها 
والله ياماما انا قولت احسن انها جات كده عشان نروح انا وانتي للدكتور اللي قولتي هنتفق معاه على موضوع ماهر ده
ثريا 
ااه يابت صح احنا لازم نروح للدكتور نتفق معاه الأول ونشوف مېته ايه ونعرفه اننا هنوديله جوزك بعد العيد وكمان عشان ماهر يبطل زن كل شوية وميتكلمش في موضوع الخلفه ده تاني استني انا هتصل بام محمد صاحبتي اللي عارفة الدكتور ده
واتصلت ثريا بصاحبتها وقالت لها انا تروح معاهم وفعلا راحو ودخلوا عند الدكتور وقالهم 
انا ياجماعه باخد في الموضوع ده 15 الف جنية بس عشان خاطر الست ام محمد الغالية دي هاخد 10 بس
سهى
طيب يعنى يادكتور لما اجيب جوزي وانت تكشف عليه وتقوله انه خلاص مش هيخلف تاني ومن هو غير هو مايكتشف الموضوع ده
الدكتور
عيب عليكي يامدام انتي مش جايه لاي حد انا دكتور كبير والكلمة اللي اقولها مفيش حد يراجع ورايا عند دكتور تاني
ثريا
خلاص يا دكتور يبقا بعد العيد نكون عندك بس المهم ان جوزها يوافق عشان يجي
وفي بيت هاني قال ليحي 
ها يامعلم هتقول لأمك على فرح ولا ايه
يحي 
انا قولتلها اني عايز اتجوز واحده بس مقولتش مين هي وقولت استني زي ما مروة قالتلي على يوم عيد الام نعرفها
مروة 
حلو واهو بكره عيد الام واحنا لازم نعرفها عشان نروح نتكلم مع أهلها ولا ايه
هاني 
صح يبقا يحيى يدخل لأمي دلوقتي يقولها وياخد رايها ولو وافقت يبقا بكرة نروح نطلب